Dialekmès
Saer 1972 organiseert
Veldeke-krink-Valkeberg 'n dialekmès.
Dat ies 'n eucharistieviering woa-in
de vaste Mèsgezange (Kyrië, Gloria,
Sanctus, Alleluja en Agnus Dei) in
't dialek weure gezonge.
Daobie zint ouch de leedsjes ter
oploestering in 't plat.
In 't jaorbook 2022-2023 van
Veldeke-Limburg sjreef Els Diederen
'n artikel woa-in ze truukkiek op 50
jaor dialekmès in Valkeberg. De
celebrante kaome neet allein oet
Valkeberg, meh ouch oet ander
Limburgse plaatse. Zie droge de
deens op in hun eige modertaal. De
mèstekste sjtoon in 'n mèsbeukske,
dat de deilnummersj tiedes de
viering ter hand weurt gesjtèld,
zoadat zie kènne mètleze en bae.
In 2024 vingk de
Veldeke-dialekmès plaats op 15
september in de
Nicolaas&Barbarakèrk (Ouw kèrk)
in Valkeberg-centrum
aanvank 11.30 oer. Celebrant H.
Jansen, emerituspesjtoar van de
parochie.
Dees 51ste Veldeke- dialekmès en nog
'n aantal ander dialekleder were
gezonge
door mannekoar Walram oet Valkeberg..
De deens sjteit dit jaor weer in
't teike van vrae en vrieheid tiedes
't weekend woa-in Valkeberg
80-jaor-bevried weurt herdach.
foto Jo van Aken © 2017
Veldeke-krink-Valkeberg vierde gouwe
dialekmès (50 jaor) op 17 september
2023
Dit jaor houp de
Veldeke-krink-Valkeberg häör 50
jaorige
dialekmès te viere. In 1972
begint zie es ièrsjte in Limburg mèt
ein eucharistieviering in
de Limburgse taal. De aanleijing ies
’t behole van ’t ièrsjte lustrum van
de krink, dae in 1967 ies opgeriech.
Ièwelank waor ’t Latien de enigste
liturgische taal in de kèrk. Nao ’t
Twiède Vaticaans Concilie weurt in
1970 de volkstaal toegesjtange in de
eucharistieviering mèt es doel dat
de geluivige kinne begriepe wat
veurgelaeze weurt en dat ze de
tekste mèt kènne laeze en bae. In
ièrsjte insjtantie gebeurt dat in ’t
Nederlands.
Umdat in deze regio ’t Limburgs de
volkstaal ies, ontsjteit ’t idee van
’n dialekmès.
’t Weurt ’n jaorelang traditie. Nao
’n onderbreking van twiè jaor
vanwege de coronapandemie, zal ‘t
dit jaor 2023 veur de fieftigste
kièr zin. Zoawie gebrukelik zal d’n
deens muzikaal en in ‘t Limburgs
opgeloesterd waere door ‘n zangkoar
oet de gemeinte Valkeberg aan de
Geul. Dit jaor ies ’t de beurt aan
zangvereiniging Orphée onder leiding
van Bianca Lenssen. ’t Gemengk koar
zingk onder miè zien eige dialekmès
woavan de tekste gesjreve zint door
Annemarie Bemelmans-Steynebrugh oet
Valkeberg, op meziek van Franz
Schubert. Daonaeve waere ander
dialekleder oetgeveurd.
't Thema van de mès ies VRAE.
Celebrant ies em. Pesjtoar H.
Jansen.
Aanvank hauf twelf (11.30
oer).
mèsbeukske veur de dialekmès oetgaaf
2009 (tekste Els Diederen i.s.m
pesjtoar H. Jansen.)
